Broedersjap Ad Arbitrium Nostrum óntwikkeltj in ‘t Marisse-Kranenbrook in Pej-Ech, in samewèrking mit de gemèndje Ech-Zöstere 't Laevesbos.
't Laevesbos is bedoeldj óm ederein dae det wiltj de gelaegenheid te gaeve óm herinneringe te deile mit angere door 't hure van eine nuuje of eine bestaondje boum. Dao kèntj ein tekstplaetje mit eige teks en/of foto bie de boum waere geplaatsj óm dudelik te make óm welke herinnering 't geit.
Dit stök bos is door de gemeinte opgesjoandj en dao zeen verhardje pajer aangelag zoadet 't bos ouch väör rolstolers toegangkelik is.
't Laevesbos is te vènje in 't Kranebrook:
1. Allein per fiets: kómmendje vanaaf De Dijk rechdoor de Leendertstraot (zandjwaeg) op 't lèste bosperceel aan de lènker kantj
2. Per auto: kómmendje vanaaf Ech äöver de Brugkwaeg (N572) richting Köningsbos achter restaurant Pepinushof lènksaaf de Dominicuswaeg op. Den de 3e zandjwaeg lènksaaf de Leendertstraot op. 't Ieëste bosperceel aan de rechterkantj is 't Laevesbos.
Ein bezeuk aan 't Laevesbos vèltj ónger bestömmingsverkieër dus g'r moog deze waeg mit d'n auto inrieje.
Parkeer d'n auto aan de kantj vanne waeg zoadanig det ouch nog anger (landjboe) verkieër langs kèntj
Geïnteresseerdje kriege de gelaegenheid óm in dit bos eine boum te plantje of eine bestaondje boum te adopteren ter naogedachtenis aan emes of ein gebäörtenis van ein (maatsjappelik aanvaardbaar en verantjwaordj) doel, dit ter beoordeiling van ‘t Broedersjap.
Es m’n eine nuuje boum wiltj plantje den kan m’n ein keus maken oet een 5-tal saorte buim, die door ‘t Broedersjap zólle waere aangebaoje:
1 x per jaor, in november, zal door ‘t Broedersjap eine boum plantj-/adoptie-daag waere gehaoje.
‘t Laevesbos is ingedeildj in 3 gedeiltes, "Kranebrook", "Vènke" en "Pieël" zoadet m’n de “regio” in ‘t bos kèntj keze wo men de boum wiltj hure.
Bestaondje buim en ouch de plaats wo eine nuuje boum geplantj geit waere, waere in de gekaoze regio (es nog besjikbaar), aangeweze door ‘t Broedersjap.
Door ‘t Broedersjap zal ein wearbestenjig plaetje van 30 x 20 cm väör ein door de huurder, bie insjrieving aan te levere teks, ter besjikking waere gesteldj. ‘t Plaetje zal door ‘t Broedersjap vaor de boum op ein päölke waere vasgemaak.
Verder zólle gein anger "prulle" in ‘t bos moge waere achtergelaote en/of aan de buim moge waere vasgemaak.
Eine nuuje boum weurdj gehuurdj van ‘t Broedersjap väör ein einmalig bedraag van € 125,00 en eine bestaondje boum väör € 75,00 (inclusief make teksplaetje).
Daonaeve waere väör ein door de huurder te bepaole periode van minimaal 5 en maksimaal 24 jaor per jaor € 5,00 väör óngerhawt in raekening gebrach. Ouch dees köste mótte väöraaf waere voldaon.
M'n krig ein raekening die väör de plantj-/adoptie-daag, betaaldj mót zeen.
Mieë-opbrèngste zólle jaorliks ten gooje kómme aan door ‘t Broedersjap te bepaole anger gooj doele zoadet de huurder indirek ouch weer dees gooj doele steuntj. Aan welk good doel 't geldj zal waere toegekèntj zal jaorliks op dees website waere bekèndj gemaak.
Klik op de link hie ónger óm 't Insjriefformeleer in te völle. De factuur krig g'r zoa gaw mögelik es g'r 't formeleer höbtj ingestuurdj.
ATTENTIE
De lèste daag van insjrieving väör de plantjdaag van november 2024 is:
31 Oktoaber 2024
Alle insjrievinge die nao dae daag bönne kómme waere pas in 2025 in november verwèrktj.
Ederein dae eine boum huurtj in 't Laevesbos krig ein oetnuuediging väör EDERE plantj daag.
Insjriefformeleer huren boum Laevesbos
Es nao verloup van tied de teks op 't teksplaetje zoe mótte waere aangepasj den kan det mit dit formeleer
De köste väör ein nuuj teksplaetje bedrage € 25,00
Aanvraog wijziging teksplaetje
Es de kóntakpersoan verangertj klik den op de link óm de gegaeves aan te passe.
Dao zeen gein koste aan verbónje
